دره‌نگانی شه‌وی ڕابردوو له‌ باكوری یۆنان، 12 كۆچبه‌ر له‌ نێو ئۆتۆمبیلێكدا تووشی ڕووداوێكی هاتووچۆ بوون

دره‌نگانی شه‌وی ڕابردوو، ئۆتۆمبیلێك به‌ 12 كۆچبه‌ری نایاسایی، له‌ سه‌ر سنوری توركیا و یۆنان به‌ڕێكه‌وت به‌ره‌و شاری ساڵۆنیك به‌ڵام له‌ ئۆتۆبانی شاری ئالێكساندروپۆلی تووشی ڕووداوێكی هاتووچۆ بوون و له‌ ڕوواوه‌كه‌دا 7 كۆچبه‌ر گیانی له‌ ده‌ست دا و 5 كه‌سیش به‌ سه‌ختی بریندار بوون.

به‌ پێی زانیاریه‌كانی ماڵپه‌ڕی Pishti-News, شۆفێری ئۆتۆمبیله‌كه‌ سورعه‌تی زۆر زیاد كردبوو، كاتێك نزیكی ناوچه‌ی ئاردانیۆ سه‌ر به‌ شاری ئه‌لێكساندروپۆلی ده‌بێت، به‌ هۆكارێكی نادیار كۆنترۆڵی ئۆتۆمبیله‌كه‌ له‌ ده‌ست ئه‌دات و ئۆتۆمبیله‌كه‌ وه‌رده‌گه‌ڕێت.

پۆلیس و ئامبوڵانس و تیمی ئاگر كوژێنه‌وه‌ی ئه‌لێكساندروپۆلی له‌ لایه‌ن شۆفێرێكی یۆنانی كه‌ نزیكی ڕووداوه‌كه‌ بوو، ئاگادار كرانه‌وه‌ و گه‌یشتنه‌ شوێنی ڕووداوه‌كه‌. به‌ پێی بڵاو كراوه‌ی تیمی ئاگر كوژێنه‌وه‌ی یۆنان، كاتێك ده‌گه‌نه‌ شوێنی ڕووداوه‌كه‌، 10 كۆچبه‌ریان له‌ نێو ئۆتۆمبیله‌كه‌ ڕزگار كرد كه‌ 8 كه‌سیان بێهۆش بوون. دوو كۆچبه‌ری دیكه‌ چه‌ند مه‌ترێك دووری ئۆتۆمبیله‌كه‌ دۆزرانه‌وه‌، دیاره‌ له‌ كاتی ڕووداوه‌كه‌دا، له‌ ئۆتۆمبیله‌كه‌ په‌ڕیون.

تا ئێستا، 7 كۆچبه‌ر گیانیان له‌ ده‌ستداوه‌ و 5 كه‌سیان ڕه‌وانه‌ی نه‌خۆشخانه‌ی ئه‌لێكساندروپۆلی كراون و دووانیان به‌ سه‌ختی بریندارن .

وه‌ك تیمی ڕۆژنامه‌وانی پشتی-نیوز په‌یوه‌ندیمان كرد به‌ به‌رپرسی نه‌خۆشخانه‌ی ئه‌لێكساندروپۆلی بۆ وه‌رگرتنی زانیاری زیاتر له‌ سه‌ر كۆچبه‌ره‌كان، ئه‌و پێی ڕاگه‌یاندین كه‌ ڕووداوه‌كه‌ هێشتا لێكۆڵینه‌وه‌ له‌ سه‌ر ده‌كرێت و دوو كۆچبه‌ر به‌ سه‌ختی بریندار بوون. هێشتا به‌ ته‌واوی ناتوانین زانیاری ته‌واو بده‌ین به‌ میدیاكان.

له‌ هه‌مانكاتدا، وته‌بێژی پۆلیسی كۆمۆتینی به‌ پشتی-نیوزی ڕاگه‌یاند: پزیشكه‌كان له‌ هه‌وڵی چاره‌سه‌ری كۆچبه‌ره‌كاندان و ڕێگه‌مان پێناده‌ن هیچ لێكۆڵینه‌وه‌یه‌ك بكه‌ین. ئه‌گه‌ری هه‌یه‌ ئێواره‌ی ئه‌مڕۆ یاخود سبه‌ینێ، لێكۆڵینه‌وه‌ له‌ گه‌ڵ كۆچبه‌ره‌ ڕزگار كراوه‌كان بكه‌ین و ئه‌وكات زانیاری ته‌واوتان پێ ڕاده‌گه‌یه‌نین.

 

پشتیوان جاف (Pishtiwan Jaf)
به‌ڕێوبه‌ری Pishti-News