کوردستان

نێچیرڤان بارزانی: ئەو مافانەی بۆ ژنانمان دابین كردووە، بەردەوامی پێ دەدەین

سەرۆكی حكوومەتی هەرێمی كوردستان لە میانەی كۆنفڕانسی بەرەنگاربوونەوەی توندوتیژی دژ بە ژنان گوتارێكی پێشكەش كرد و ڕایگەیاند، “ئەو مافانەی لە ٢٥ ساڵی رابردوودا بۆ ژنانمان دابین كردووە، بەردەوامی پێ دەدەین”.

هەڵمەتی بەرەنگاربوونەوەی توندوتیژی دژ بە ژنان كە لە رێككەوتی ٢٧ـی ١١ـی هەموو ساڵێك ئەنجام دەدرێت، ئەمساڵیش ئەو هەڵمەتە لە هۆڵی شەهید (سەعد عەبدوڵڵا) بە ئامادەبوونی چەندین كەسایەتی و رێكخراوی مافی مرۆڤ و ئافرەتان و ژنان بەڕێوە چوو، كە تێیدا سەرۆكی حكوومەت و جێگرەكەی و نوێنەری نەتەوە یەكگرتووەكان بەشدار بوون.

لە میانەی كۆنفڕانسەكەدا سەرۆكی حكوومەتی هەرێمی كوردستان (نێچیرڤان بارزانی) گوتارێكی پێشكەش كرد، كە تێیدا ئاماژەی بە هەوڵەكانی حكوومەتی هەرێمی كوردستان لە ماوەی ٢٥ ساڵی حكومڕانیدا بۆ دەستەبەركردنی مافەكانی ژنان كرد و نموونەی بە دانان و هەمواری چەند یاسایەك هێنایەوە، كە تا رادەیەك تواندراوە لە رێیانەوە توندوتیژی دژ بە ژنان لە هەرێمدا كەم بكرێنەوە، ئەویش بە توندرین شێوە سزادانی كوشتن لە ژێر ناوی شەرەف، هاوكات هاوسەرگیریی كچان بۆ تەمەن ١٨ ساڵ بەرز كراوەتەوە، یاسای ژمارە ٨ـی ساڵی ٢٠١١ هەنگاوێكی دیكە بوو بۆ دابینكردنی یەكسانی و دادپەروەریی كۆمەڵایەتی، باسیشی لەو یاسایانە كرد، كە بۆ بەرگریكردن لە مافی ئافرەتان كە لە رێی مۆبایل و ئینتەرنێتەوە دژ بە ژنان كراوە.

لە بەشێكی دیكەی گوتارەكەیدا سەرۆكوەزیرانی هەرێم، تیشكی خستە سەر ئەو توندوتیژیانەی بە هۆی ناهەمواریی بارودۆخ و شەڕەوە دژ بە ئافرەتان دەكرێن و نموونەی بە ئافرەتانی ئێزدی هێنایەوە، كە كاری جیددییان بۆ ئازادكردنی ئەو ئافرەتانە كردووە كە لە دەست تیرۆریستانی داعشدا ماون تا ئازاد بكرێن، هەروەها هەوڵەكانیشیان بۆ ئازادكردنی ژنانی ئێزدی بەردەوام دەبێت، كە لە ئەنجامی شەڕ تووشی بوون و، بە شێوەی سیستماتیك كاری لەسەر دەكەن.

هاوكات ئاماژەی بە هێرشی سوپا و حەشدی شەعبی بۆ كەركووك و ناوچەكانی دیكە دا، كە بووەتە هۆی ئاوارەبوونی ١٦٠ هەزار كەس و تێیدا چەندین ئافرەت رووبەڕووی توندوتیژی بوونەتەوە. گوتیشی: “دیارە ژنان باجی ناهەمواریی بارودۆخەكە دەدەن و كار و چالاكییان سست دەبن و پرۆسەی دادوەری دەچێتە دواوە، ئێمە دووپاتی دەكەینەوە، كە مافەكانتان ناچنە دواوە و لێناگەڕێین ببنە قوربانیی شەڕ و پێكدادان، بەڵێن دەدەین ئەو دەسكەوتانەی لە ٢٥ ساڵی رابردوودا بە دەسمان هێناوە، پارێزگاری لێ بكەین”.

سەرۆكی حكوومەت لە درێژەی گوتارەكەیدا هێمای بۆ ئەوە كرد، كە كاری جدییان لە پرسی ژنان كردووە، بڕوایشیان وایە دادپەروەری دەبێتە بناغەی ئاشتی، ئەویش بە راوێژكردن لەگەڵ پسپۆڕ و شارەزایان و چالاكوانان و ئافرەتانی گشت لایەنەكان لە پەرلەمانی هەرێمی كوردستان كە كاریان بۆ دابینكردنی مافی مرۆڤ كردووە، ئەویش بە گۆڕینی یاسای باری كەسێتی، كە لە بەرژەوەندیی ژناندا بووە.

هەروەها باسیشی لەو هەنگاوە كرداریانەی تری حكوومەتی هەرێم بۆ رێگریكردن و كەمكردنەوەی توندوتیژی دژ بە ژنان كرد، وەك دامەزراندنی بەڕێوەبەرایەتییەكانی توندوتیژی دژ بە ژنان و ئەنجوومەنی باڵای خانمان و بۆردی چاودێریی خانمان بۆ چاككردنی دۆخی كۆمەڵایەیەتی و بەرگریكردن لە مافەكانیان، دابینكردنی مافی ئافرەتانیشی بە بەشێك لە پرۆسەی دیموكراسی لە ناوچەكە ناو برد، كە تەنیا لەو رێیەیشەوە دەتوانرێت مافی هاووڵاتی دابین بكرێت و كۆمەڵگەیش بەرەو پێشەوە ببرێت.

لە كۆتایی گوتارەكەیدا (نێچیرڤان بارزانی) داوای لە دەسەڵاتدارانی بەغدایش كرد كە رێگری بكەن لە بەشوودانی كچانی خوار تەمەن ١٨ ساڵ و گوتی: “ئەوان لەو قۆناغەی تەمەنیاندا پێویستیان بە خۆشەویستیی خانەوادەیان هەیە”، داوایشی كرد ئەو پڕۆژەیەی كە ئێستا لە پەرلەمانی عێراقدا هەیە، نەبێتە یاسا.

زیاتر ببینه

ئه‌مانه‌ش ببینه‌

Back to top button